h1

Prospek & Inokulasi

GUNA & PROSPEK GARU

Garu nya dikena ngaga minyak angi (Parfume), nyengkaum minyak angi ke mar-mar rega, digagaka minyak urut, kena ngaga kosmetik, ke ubat enggau mayuh guna ke bukai mega. Menua ke pemadu mayuh beguna ke garu lalu ngimport dalam kuantiti ti besai nya menua Arab Saudi. Ari sumber, (TRAFFIC International 2002)export garu penyampau RM48.3 juta ngagai menua Arab Saudi lalu nya semina ngenyukupka 20% ari pemayuh ke dipinta menua Arab. Reti nya, 80% da agi dipinta, tang bedau chukup laban garu ba dunya tu agi mimit. dia menua Asia Tenggara bisi

Kayu tu semina bisi ba menua India, Indonesia, Burma, Cambodia, Thailand enggau Malaysia. Ba menua Malaysia, asil garu semina bepanggai ba Orang Asli di Semenanjung enggau bansa Penan ba Sarawak lalu sida tu ngiga garu enggau chara ’ngarapka kijang dalam babas’; betebang ke kayu Engkaras ba kampung jerung, nyabung nasit aja. Berapa mayuh mih garu ke ulih giga sida nya ba kampung kitai Malaysia?

RETI INOCULATION & NI MAYA

Dalam jaku Iban, ’inoculation’ lebih kurang mai reti tuchuk (jik). Nitihka pansik orang ke landik lalu bepelajar ba sains kayu, semina kayu Engkaras ke tumbuh sakit aja deka ngasilka garu. Nya alai, dikena ngasuh kayu Engkaras nya sakit, dia teknik inoculation dikena. Pengudah 4 taun ditanam, dia kayu Engkaras udah tau berengkah dijik ngena sebansa kimia. Batang kayu ditebuk (drill) lalu dipasuk tauka dituangka enggau sebansa kimia (Dijik enggau kimia). 6 bulan pengudah dijik, dia iya mula ngasilka garu. Dua taun udah dijik, garu udah tau diambi.

DINI BULIH KIMIA KENA NGEJIK KAYU & BERAPA KOS?

Ba Kelantan enggau Johor di Semenanjung Malaysia, udah bisi orang tauka kompeni ti ulih mekal kitai enggau kimia sereta teknologi nya. Nama tusah, ni-ni maya enda lama da, teknologi nya tentu bisi ba menua kitai Sarawak ditu. Nama agi, diatu Jabatan Hutan Malaysia pan udah nemu kayu tu bisi potensi nyadi eksport menua Malaysia. Perintah mega deka untung ari chukai (tax) lalu nya mega nyadika asil menua Malaysia. Enggau nya, perintah tentu mega deka mai teknologi nya ngagai kitai.

Enti sema pengawa ngejik enggau meri kimia nya dipejalaika kompeni luar pan kitai enda ibuh tusah pasal nanggung rega kimia enggau kos ngejik kayu nya. Kitai tau ngasuh kompeni nya ngejik ke kitai lalu semua kos nya tau tulak ari rega garu ga enti iya udah nyadi garu! Nama tusah! Kelimpah ari nya kitai tau ngena chara bela untung (win win situation) – sida ngejik ke kitai, udah kayu ngasilka garu, nya baru kitai mayar sida tauka meri ungkup sida sekalika ngena chara percentage ari asil garu tauka bayar ngena mata duit rega garu nitihka agreement. Nadai jalai sida enggai enti kitai ngena sistem ke meruan, ngena ’agreement’ ke chukup enggau atur sereta sempekat ti diuruska lawyer.

Nya mih reti iya BEKEBUN NGENA PEMINTAR tauka ’SMART FARMING’ ba abad 2020.

BAKA NI CHARA NANAM KAYU ENGKARAS

Nadai mayuh leman! Baka ke nanam getah, nanam buah nya mih iya laban kayu tu endang kayu kampung. Pama getah ka nyadi, iya ka mih nyadi dia. Tanam empat lima kayu sebelah nisi rumah nadai mih salah, amat mih bisi, amat mih kitai enda tinggal nanam. Nih kelia pan orang nadai mayuh deka betanamka getah betanam sawit. Diatu nama nya nyau nanam memagang ga mensia? Nya alai, aram bela nanam, awakka kitai dulu ari orang bukai.

Ingat, enti sepun kayu ulih ngasilka enda ibuh mayuh, ambi mih 5 KG. Enti kayu Engkaras tanam kitai nisi rumah tauka sebelah belakang bilik kitai bisi 5 pun, dia kitai deka bisi 25 KG garu. Enti sekilo nya RM2,000.00 dia kitai bisi RM50,000.00. Nama giga agi? Ukai nya nangika diintu baka ke nanam koko nanam lada tauka sawit dih?

Nanam kayu tu nadai beleman. Nitihka pansik Jabatan Hutan ba Semenanjung Malaysia, iya tau ditanam pisit datai ke 6 kaki penyarang. Taja pia, ba penemu aku empu, dia 8 kaki penyarang nya manah agi laban awakka iya jampat mansang. Kebuah pia, kitai selalu meda penumbuh kayu getah. Enti kelalu pisit, lubah kayu getah mansang.

Dalam seekar bisi 4046 meter persegi tauka 43,560 kaki persegi. Reti nya seekar bisi 64 Meter X 64 Meter tauka 208 kaki X 208 kaki. Enti kitai nanam iya enggau penyarang 8 kaki, dia seekar bisi 676 pun kayu Engkaras lalu enti 10 kaki penyarang, bisi 400 pun seekar.

Maya kayu tu agi mit, kitai tau nanam utai bukai entara kayu nya baka jagung, terung, nanas tauka ubi enggau subung ke lalu tau dikena nupi babi mega. Padi mega tau ditanam dia, baka orang ke nanam padi ba kebun lada. Kebuah pia, enggai ke tanah nya tebasau ngapa tumbuh rumput bukai. Pama kayu udah ninggi dada, kitai enda kiruh agi nyaga tauak ngerachun rumput.

REGA GARU

Rega garu ulih datai ngagai RM15,000.00 ngagai RM20,00.00 sekilogram (Grade double super) tang rega nya bepanggai mega ba kualiti ti ditentuka enggau gred garu. Taja pia, jai-jai pan gred, agi mih iya garu lalu jai-jai pan rega, datai mih beribu tauka beratus mih sekilogram! Baka sempama Iban, kurus-kurus pan baya, agi mih iya baya, enda mih iya dikumbai bayak! Agi mih nya garu tadi.

Nya alai, nadai salah kitai bemimpika kayu Engkaras kitai ulih ngasilka pengabis nadai 2 kilogram sepun! Ambika banding, enti kitai bisi nanam 100 pun kayu Engkaras, dia kitai deka bulih 200 KG garu. Enti rega iya ambis baruh RM2,000.00 sekilogram, dia kitai bisi 200 KG X RM2,000.00 = RM400,000.00 tauka 0.4 juta ringgit!!

NGAGA GARU

Bah, enti ukai semua kayu Engkaras nya bisi garu ba puak iya, kati alai kitai berani nanam garu dih? Legi tanam 1000 pun, kada bisi sepun ke ngasilka garu dih? Nih sida Orang Asli enggau sida Penan ke udah disebut ba atas nya tadi dih nyau bebulan ba kampung din betebang ke kayu Engkaras kekadang nadai ga bulih garu? Enda ngerugi diri nanam kayu Engkaras?

Enda! Diatu jeman teknologi Sains udah mansang. Ngena teknologi ke dikumbai inoculation, dia tiap iti kayu nya ulih ngasilka garu! Dalam jaku English ~ a method was developed to induce the production of gaharu in young plantation trees. The trees are wounded or inoculated in a specific manner and the gaharu production as the natural defence response is supported by applying specific treatments. This method can ensure the sustainable production of gaharu in plantation trees.

3 comments

  1. salam kaban..
    aku bc nyual anak garu jenis malaccenis
    n aku baru udah siap ngagak projek ngejek kayu garu..
    utai bukai tau peda nn ba http://engkaras.blogspot.com
    gen7


  2. Unggal aku ka nanya berapa lama endor kayu tu tau mansut ke asil?


  3. bos aq berminat ka nanam kayu garu.berapa modal ya t ku ka nanam dalam 100@200 batang?



Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: