Tempalai Kenang

Agi kelia, mayuh kitai kala ninga cherita orang ke tuai besebut pasal pengawa orang begiga ke garu ba kampung jerung. Pengawa nya datai ke bebulan di puak kampung jerung, betebang ke kayu Aquilaria. (Nama saintifik) Kayu nya ditebang lalu dibelah laban deka ngiga garu ba puak kayu nya. Enda nyalah-nyalah baka orang ke ngiga geliga ba perut jelu angkis tauka landak. Ngetan panjuk, iya mih bulih jelu angkis, buntas ga perut deka ngiga geliga. Kekadang datai mengempat puluh iku jelu udah sintak panjuk lalu dibuntas, diperuti ga perut ngiga geliga, suah agi ke enda bulih!

Kayu ke dikumbai Aquilaria nya mih ke dikumbai kitai Iban kayu Engkaras. Kediatu ketebal agi pengawa begiga ke garu dikereja bala sida bansa Penan di Ulu Baram lalu bisi mega dikereja bansa Dayak ke bukai. Di Semenanjung Malaysia, pengawa nya dikereja bala Orang Asli.

Pengawa betebang ke kayu Engkaras ngiga garu di kampung jerung nya nyabung nasit. Ari beratus pun kayu Engkaras ditebang, enti nasit manah angka ga bisi bulih mimit. Ukai semua kayu Engkaras bisi garu ba puak tang orang majak ga ngiga garu. Kebuah iya siti aja – garu chukup berega!!

NAMA UTAI KE DIKUMBAI GARU

Garu iya nya ‘resin’ ba puak tauka tengah batang kayu Aquilaria tauka kayu Engkaras. Kayu Engkaras tu mayuh bansa (spesis) nitihka menua alai iya tumbuh. Bisi sumber ti kala ditemu madahka spesis Aquilaria subintegra ari menua Thailand ulih ngasilka garu gred A. Taja pia ba menua kitai Sarawak enggau Sabah, spesis ke mayuh nya spesis Aquilaria malacensis, lalu nitihka sumber internet mega, spesis Aquilaria malacensis tu ngasilka garu ti bisi gred lalu tu mih spesis ketebal agi ngasilka garu ke dijual.